Belén Martín Franco enviounos os traballos do seu alumnado do IES Fonmiñá, nos que o poema "Tarxeta de visita" de Manuel María lles serve de inspiración; aquí vos deixamos a ligazón para poder ler as súas creacións:
https://drive.google.com/file/d/0B8Ohcym3bJ_hZnpDa0dwNGVfd1k/view?usp=sharing
Moitísimas grazas e parabéns polo voso traballo!
Alguén máis se anima?
PROPOSTA 14. VISITAS Á CASA DE MANUEL MARÍA
Aquí temos as impresións do alumnado do IES Fonmiñá, despois de realizar unha visita á casa de Manuel María no curso pasado:
“O luns 20 de abril fomos a Outeiro de Rei visitar
a casa de Manuel María. Primeiro, percorremos as distintas estancias
acompañados do guía. En cada unha das habitacións estaban colocados os mobles e
os cadros tal e como cando el vivía. Chamoume a atención a grandísima cantidade
de libros e que estaban ordenados coma el os tiña. Despois, vimos un pequeno
documental sobre como era a casa antigamente. Por último, saímos apra ver os
arredores da vivenda e alí atopámonos con Pepa, a cuñada de Manuel María, que
se alegrou moito de que fosemos por alí e estivo un anaco falando con nós e
lembrando anécdotas sobre a vida naquela da casa tempo atrás. Foi unha visita xenial!” NEREA IGLESIA VILA
“… Sorprendeume que a casa de Hortas tivese cento
trinta anos porque co reformada e ben coidada que estaba, non o parecía, pero o
mellor foi o interior: cada recuncho, cada habitación era unha parte da vida e
personalidade de Manuel María, cada obxecto, cada moble, tiña un significado.
Iso foi o que máis me gustou, que a casa estivese chea de significados e
lembranzas que nos levaban a Manuel María e á súa vida. Supoño que quen se
queira sentir máis cerca del ten que ir visitar esa casa. O que máis me gustou
foi a ventá da Arcadia, pareceume moi orixinal. O guía, Fran, foi moi bo con
nós, tratounos moi ben e quedei impresionada coa chea de cousas que
sabía…” LAURA IGLESIAS.
“….recibíronnos na antiga palleira da casa,
transformada nun pequeno auditorio onde nos explicaron como sería a visita.
Logo, pasamos ao que sería a entrada do fogar, o antigo comedor, á cociña. No
segundo andar visitamos o cuarto e a cama onde naceu, o seu cuarto, despois
pasamos ao seu pequeno escritorio onde estaban todos os libros colocados
exactamente coma os tiña el. Pasamos ao salón e a unha sala onde estaban todas
os seus libros (….) Ao final visitamos a corte, convertida en biblioteca…” IVÁN
GARCÍA TEIXEIRA.
“…O que máis me gusto da visita, á parte da casa,
que é moi grande e moi bonita, foi Pepa, a cuñada de Manuel María, unha señora
moi cariñosa e boa.” SANDRA EIRAS.
“… fomos ben acollidos por Fran, que fixo unha
pequena presentación do que iamos ver, logo ensinounos a casa, moi bonita,
grande e con mobles preciosos, e despois vimos un vídeo. Antes de marchar
falamos con Josefa (Pepa), a cuñada de Manuel María, que nos contou historias
de cando o escritor era rapaz e das pelexas cos seus irmáns…” ZOBAIDA EL HIDAM.
“… Estivemos visitando a casa onde Manuel María
pasou a súa infancia. Había un cuarto onde tiña todos os libros que foi lendo
ao longo da súa vida (…) Ao final
estivemos falando con Pepa, que era a cuñada de Manuel, que estivera vivindo
nesa casa ata hai poucos anos. É unha muller encantadora que nos explicou as
cousas e gustos de Manuel María. En resume, gustoume moito e desexaría volver
outro día.” SILVIA OBARRIO.
“…. A casa era moi bonita por fóra e cando entramos
estivemos vendo toda a casa, que era preciosa e grande. O que máis me
impresionou foi a cantidade de libros que tiña, tamén me gustou moito as vistas
que tiña o balcón….” LAURA VILLAMEL VILLAPOL.
“…esta casa na que ata hai uns anos vivía a familia
de Manuel María, converteuse nunha casa-museo na vila de Outeiro de Rei. Era
una casa de labregos ricos. Por ela pasaron moitas persoas importantes (…)
Tamén coñecemos a Fran, o guía, un home simpático e de moitas palabras que nos
acompañou e nos explicou todo sobre esa fermosa casa.” HUGO RIGUEIRO ÁLVAREZ.
“…. Ao chegar, un rapaz contounos algo sobre Manuel
María e a súa viúva, Saleta. Despois os de 4º quedaron vendo un vídeo mentres
os de 3º fomos ver as habitacións unha por unha. O que máis me chamou a
atención foi a colección de navallas que tiña, xa que ningunha se repetía. En
acabando a nosa visita, os de 4º tomáronnos o relevo e quedando vendo o vídeo
mentres eles ían ver a casa….”
JONATHAN MACHADO LOSADA.
“…Unha casa labrega moi grande situada detrás do
Concello, coñecida coma a Casa de Hortas. O noso guía contounos moitas cousas
do escritor: as súas experiencias, o que lle gustaba e o significado de moitos
mobles…”
ÁLEX IGLESIAS MÉNDEZ
“….unha vez que entramos, Fran explicounos como foi
a vida de Manuel María, e como foi que xurdiu facer da casa un museo grazas a Saleta, a súa viúva. Logo amousounos
a casa que, por certo, era impresionante o bonita que estaba e tamén foi
precioso poder ver as cousas persoais de Manuel María (…) Tivemos a gran sorte de coñecer a Josefa, a
cuñada de Manuel María, tamén chamada Pepa a de Hortas. Para min poder escoitar
a Pepa falar de Manuel foi moi bonito, falaba del con moito cariño…” NEREA SECO EDREIRA.
“Na visita á casa de Manuel María, “Casa de
Hortas”, paseino xenial, foi moi interesante xa que aprendemos cousas que non
sabíamos del. O que máis me impresionou foron as moreas de libros que alí
había, iso si, ben colocadiños. (…) Outra cousa que me gustou foi poder ter a
oportunidade de falar con Josefa, coñecida en Outeiro de Rei por “Pepa de
Hortas”, que nos contou moitas historias de Manuel María. Ao escritor tamén lle
gustaba moito o lacón de porco.” MICHAEL SECO EDREIRA.
“… A min gustoume moito a visita porque estivo moi
interesante todo o que vimos na casa. Fran era o encargado de nos ensinar a
casa e contounos como fora a vida de Manuel María alí, na Casa de Hortas. O que
máis me chamou a atención foi a cantidade de libros que tiña…” CHRISTIAN OTERO
PÉREZ.
“ A visita gustoume moito, é unha casa preciosa moi
ben conservada. Cando chegamos, o guía explicounos un pouco como era Manuel
María. (…) Pasamos ao salón onde recibían as visitas, despois a unha sala onde
tiñan todas as publicacións de Manuel María en vitrinas; logo, a unha sala onde
tiñan fotos e premios que recibira (…) Finalmente vimos unha curtametraxe sobre
o autor que recibiu o premio Mestre Mateo. Tamén falamos con Pepa, a cuñada de
Manuel María, que nos contou moitas anécdotas do autor e dos seus amigos.”
NOELIA OTERO FERNÁNDEZ.
“….Os de 3º fomos os primeiros en visitar a casa.
Vimos o cuarto onde naceu, o seu despacho onde escribía os poemas. Despois, o
que máis me chamou a atención foi a multitude de libros que tiña en galego (…)
Foi unha visita moi bonita.” ANA BELÉN CORREDOIRA.
Moitísimas grazas pola colaboración!
KAMISHIBAI
Non vos perdades o kamishibai que nos enviaron desde o CEIP Plurilingüe A Pedra de Bueu, Pontevedra. Está realizado polo alumnado de 3º e 4º de EP para ser contado en diferentes lugares da vila.
Moitas grazas a Ami por mandalo!
Aquí o podemos ver:
KAMISHIBAI CEIP A PEDRA DE BUEU
Ningún comentario:
Publicar un comentario